मोहक सुंदर आरती

।। मोहक सुंदर ।।

मोहक सुंदर मूर्ती मनोहर, जणू चैतन्याची ।
सद्भावे मी आरती करितो, श्रीवेतोबाची ।।धृ ।।

मूर्ति जणु ही मजला गमते, प्रेमळ कृष्णाची ।
कधी गमे ती काजळ काळी,पंढरीनाथाची ।
कधी शिवाची कधि विष्णुची, कधी ती भाऊंची । जय जय ।।१।।

गुरुरायाची माया जणु का मोहरुनि फुलली ।
पुंडलीकाच्या विठूरायासम भेटीस कां आली ।
आरवलीची माय माऊली, सुरभि भक्तांची । जय जय ।।२।।

अमल प्रीतीने, गोपीसम जो पाहिल मूर्तिस ।
अनन्य भावे शरण जाऊनि, होईल जो दास ।
तो देवाचा, देव तयाचा प्रचिती ध्यासाची । जय जय ।।३।।

<< माझी वेतोबा माऊली        देव माझा किती देखणा >>